السيسي مهاجما الإخوان: "يا يحكموا يا يقتلوا.. قلوبهم مريضة"
الخميس 07/نوفمبر/2019 - 02:13 م
طباعة
أميرة الشريف
هاجم الرئيس السيسي، جماعة الإخوان الإرهابية، بسبب استهدافها للشعب المصري بالقتل والتخريب والشائعات.
وقال السيسي خلال الاحتفال بذكري المولد النبوي الشريف: "اوعوا تفتكروا يوم ما قلت في 24 يوليو 2013، الكلمة اللي هي بتاعة الإرهاب وعاوز تفويض، عاوز أقولكم في الوقت كتير من اللي كانوا معانا مستهجنين الدعوة، وتفويض إيه وإرهاب ايه اللي بتقول إننا هنقابله في مصر، وإنك عاوز تفويض تتعامل معاه بعد كده".
وأضاف رئيس الجمهورية: "أصل عندهم المنهج كده يا يحكموا ويقتلوا، فكنا رايحين للحرب ومكنتش هقدر أروح للحرب دي، ولما انتوا عملتوا 30 يونيو مكنتوش تعرفوا إن النتايج هتكون كده، إنهم هيفضلوا ورا منكم ويقاتلوكم بالكلمة والكذب والافتراء، غير السلاح والتخريب والتدمير، النفوس مريضة وقلوبهم مريضة، لا يمكن تكون قلوب سوية وسليمة تؤمن بالله تعمل في الناس كده".
السيسي عن الإخوان: بواجههم بإرادة من حديد "لاجل خاطر الدين"
وشدد رئيس الجمهورية، على أنَّه يواجه جماعة الإخوان الإرهابية، بإرادة من حديد: "أنا عندي إرادة لا تلين في مواجهتهم؟ طبعًا، من حديد، من حديد".
وأضاف السيسي: "بالمناسبة، أنا بواجه في إطار مواجهة لاجل خاطر الدين، كل الدين، لأن اللي بيحصل ده كان له تأثير سلبي كبير جدًا على فكرة الأديان والاعتقاد في الله سبحانه وتعالى، الناس تشككت إيه القيم والأديان اللي تطلع وتقتل في الناس بالطريقة دي، مش ممكن".
وتابع الرئيس: "شوفوا اللي بيحصل كل يوم وانتوا تعرفوا إن انتم في قتال، وفي نضال مستمر وشوفوا كل يوم في حكاية، أنا والله ما اعرف هيقابلوا ربنا بالكدب ده كله إزاي، ده كدب كتير ربنا يكفينا شرهم".
السيسي عن تجنيد الإرهابيين عبر السوشيال ميديا: عمر الأمم ما هتطلع قدام
وحذر الرئيس عبدالفتاح السيسي، من نشر الشائعات عبر مواقع التواصل الاجتماعي، مضيفًا "يا ترى الدين بيقول إيه في الكذب اللي إحنا بنشوفه عبر مواقع التواصل الاجتماعي كلنا؟ من غير ما نحس بننقل عن بعضنا دون إدراك إننا في يوم من الأيام إذا كنا عارفين إننا هنقابل ربنا، وهنتحاسب على كل اللي عملناه".
وأضاف: "كل يوم بنكدب، بتكلم على مواقع التواصل، مش بتكلم على الإرهاب خالص، والفيلم اللي شفناه هنا مغطاش الحقيقة، حقيقة الإرهاب والتدمير والخراب، اللي في دول كتير وضحايا وأكترها في دول المسلمين".
قال الرئيس عبدالفتاح السيسي إنّ شبكات التواصل الاجتماعي والسوشيال ميديا، يستخدمها متطرفون في بعض الأحيان، لتجنيد الشباب وتعليمهم وتكليفهم بالجرائم الإرهابية والمتطرفة، دون أن يلتقي أي طرف بالآخر.
وتابع رئيس الجمهورية: "عمر الأمم ما هتطلع قدام بالطريقة دي، وإحنا كمصريين وكبشر معنيين بإننا نعلم ولادنا عشان يبقوا أسوياء".
وواصل: "لما تلاقوا بيت انفصل الزوج والزوجة بتاعته، وتجد الأم أو الأب في خصومة، والكلام ده يتم بناؤه وغرسه من غير قصد في نفوس الأبناء، يا ترى الأبناء دي هتطلع أسوياء؟، أبدًا، ده قمة عطاء الأسرة في حالة عدم التفاهم، إنهم يخلوا بالهم إنهم عاوزين يطلعوا ابنهم أو بنتهم على درجة عالية من الاستواء، لأجل حياتهم لما يكبروا".
